O Centro de Investigación Mariña (CIM) da Universidade de Vigo (UVigo) constituíu o primeiro banco nacional de area de praia de España, no marco do proxecto Iberarenu, financiado pola Fundación Española para a Ciencia e a Tecnoloxía do Ministerio de Ciencia, Innovación e Universidades (Fecyt). Segundo recolle o Diario da Universidade de Vigo (DUVI), o banco conta xa con máis de 130 mostras procedentes de praias de toda a península ibérica, recollidas pola cidadanía seguindo unhas instrucións facilitadas polo equipo investigador e enviadas posteriormente á UVigo para a súa catalogación e análise.

A idea é que Iberareum non teña “data de caducidade”, xa que o obxectivo do CIM é que o banco de area siga crecendo ao longo do tempo, reunindo novas mostras e analizándoas con fondos propios do Centro. “Involucrar á sociedade no proceso científico é unha poderosa ferramenta para dar a coñecer o medio mariño e a importancia de conservalo. As praias son ecosistemas en constante cambio debido a factores como o clima ou as características xeolóxicas da súa contorna e analizar a area axúdanos a comprender a súa evolución, os impactos do cambio climático e permite mellorar a xestión sustentable dos recursos costeiros”, reivindicou o director do CIM, Daniel Rei.