A Audiencia de Pontevedra condenou a 13 anos e medio de cárcere a J.C.M.A., exmembro dunha congregación de Testemuñas de Xehová de Vigo, como autor de tres delitos de agresión sexual a dous menores de idade (ambas as de 15 anos), ás que coñeceu pola súa vinculación con esa comunidade relixiosa.
A sección quinta da Audiencia de Pontevedra, considerou probado que o home, que coñecía a unha das nenas porque tiña contacto coa súa familia e eran todos membros da mesma congregación, manifestáballe de forma reiterada o seu desexo de ter relacións sexuais con ela e dáballe agasallos.
Tamén considera probado que lle fixo tocamentos no coche, nunha data indeterminada, e que a principios de abril de 2023, estivo con esta nena e cunha amiga súa no seu coche, nunha zona apartada do aparcadoiro dun centro comercial da cidade olívica. Alí, fíxolles tocamentos e, a unha delas, introduciulle os dedos na vaxina e fixo que o masturbaran a cambio de diñeiro. Días despois, tivo un encontro cunha delas no aparcadoiro do hospital Álvaro Cunqueiro, onde a menor, tamén a cambio de diñeiro, volveu a masturbalo.
O tribunal sinala na súa sentenza que non ten dúbida deses feitos, e que as menores fixeron un relato dos mesmos con firmeza, de forma clara e detallada. Así, a Audiencia outorga credibilidade a eses testemuños, sen ver motivos espúreos, e engade que están corroborados por probas como conversacións de WhatsApp, informes forenses ou declaracións doutras testemuñas. Aínda que o procesado negou os feitos durante o xuízo e atribuíu as acusacións a un intento de “chantaxe” por parte das menores, o tribunal insiste en que hai proba suficiente para desvirtuar a presunción de inocencia.
A sentenza, que non é firme e pode ser recorrida ante o Tribunal Superior de Xustiza de Galicia (TSXG), recolle tamén as penas de inhabilitación para patria potestade e tutela durante 12 anos, inhabilitación para exercer profesión que implique contacto con menores durante 18 anos, medida de liberdade vixiada durante 11 anos e pago de indemnización de 4.000 euros a unha das vítimas e de 10.000 euros á outra, ademais da prohibición de achegarse e comunicarse con elas. Todo iso como autor de dous delitos de agresión sexual sobre menor de 16 anos, e un delito de agresión sexual sobre menor de 16 anos con introdución de membro corporal.
