O PP de Vigo censurou este xoves a “frialdade” da concelleira de Seguridade, Patricia Rodríguez, investigada por un posible homicidio imprudente polo accidente mortal do Saltamontes, por tentar exculparse no xulgado de instrución e sinalar a responsabilidade da Policía Local, e volveu pedir o seu cesamento.

Así o trasladou a presidenta local do partido e portavoz municipal do PP, Luisa Sánchez, despois da publicación en varios medios do vídeo da declaración da edila socialista o pasado febreiro. Nas imaxes, como xa transcendeu no seu momento, Patricia Rodríguez sinala a Policía Local como responsable de precintar a atracción, que non contaba con autorización municipal, aínda que non houbo unha orde expresa nese sentido (e o Saltamontes non foi precintado nin se paralizou a súa actividade).

“Paréceme escandaloso porque se trata dunhas declaracións con moi pouca empatía, (…) cunha frialdade pasmosa, tentando exculparse e botándolle a culpa á Policía Local, a funcionarios cos que traballa a diario”, sinalou Luisa Sánchez, que lle afeou á concelleira que dixese que non toma decisións e que se limita a “asinar o que lle poñen”.

Para Luisa Sánchez, é “bochornoso” que a responsable de Seguridade e Festas lle dixese ao xuíz que descoñecía o calendario das festas de Matamá, aínda que constatou que, pese a esa declaración, “non se librou da imputación” e “todo apunta a que cada vez está máis cerca de que se lle abra xuízo oral”.