O Tribunal Superior de Xustiza de Galicia (TSXG) recoñeceu ao veciño da parroquia viguesa de Cabral a titularidade dunha leira tras case 30 anos de conflito coa Comunidade de Montes en Man Común de Santa Mariña de Cabral. En concreto, o TSXG inadmitiu a trámite o recurso de casación interposto pola representación legal dos comuneiros a unha sentenza da sección sexta da Audiencia Provincial de Pontevedra, con sede en Vigo, que á súa vez desestimaba un recurso contra un fallo do Xulgado de Primeira Instancia número 1 da cidade, que desestimaba as pretensións da Comunidade de Montes.

Segundo explica a Plataforma Gelaga de Afectados por Comunidades de Montes, a parcela pertence á familia de Ramón Arines, quen a comprou en 1996 para reconstruír a casa alí existente e ir vivir nela. “Pero o seu proxecto durou moi pouco tempo, porque se viu obrigado a parar as obras no inmoble pola presión dos comuneiros, empeñados en facer unha permuta, e polas sucesivas accións intimidatorias que sufriu, como un incendio ou unha derriba parcial do muro de peche”, indica a Plataforma. Durante todo o proceso xudicial, volveuse a pór en cuestión a validez do plano de 1891 no que se basean os comuneiros para reclamar a titularidade das parcelas. A Plataforma aplaudiu esta resolución, que pon fin ao calvario que sufriu o dono do terreo durante décadas”.