A folga do servizo de recollida de lixo en Vigo cumpre este martes a súa terceira xornada e xa son, segundo as estimacións do comité de empresa, unhas 840 toneladas de residuos, entre orgánico e envases para reciclaxe, as que se acumulan nas rúas da cidade. Este martes, novamente, os traballadores da empresa concesionaria, FCC, saíron á rúa en manifestación para reclamar un convenio digno e remataron a marcha fronte ao Concello, onde unha representación do persoal foi recibida polo concelleiro de Fomento, Javier Pardo.

O encontro produciuse despois de que o propio comité solicitase formalmente ao Goberno local que mediase no conflito laboral e que instase a dirección da empresa a sentar a negociar “sen chantaxes”. “A postura da empresa é absolutamente irresponsable”, sinalou este martes o presidente do comité, Suso Diz, quen criticou o bloqueo dos contactos para renovar o convenio.

Tras a reunión celebrada con Pardo, fontes sindicais trasladaron que o concelleiro “se limitou a anotar as reivindicacións do persoal”, polo que os traballadores agardan que se produzan movementos institucionais proximamente. Por parte do Concello de Vigo, non se trasladou publicamente, de momento, ningunha valoración nin posicionamento oficial respecto deste conflito que afecta o día a día da cidade.

Segundo lembrou Suso Diz, o comité mantén como “liña vermella” innegociable a xubilación parcial, un dereito ao que non están dispostos a renunciar e do que gozan desde hai máis de vinte anos, así como unha actualización salarial acorde coa suba do IPC. Na noite deste martes, os traballadores volverán reunirse para realizar o sorteo dos servizos mínimos das próximas xornadas e decidir o calendario de novas mobilizacións, entre as que o comité xa expón unha nova manifestación para este mércores.