Carmen García Mateo tomará posesión como reitora da Universidade de Vigo o próximo 25 de xuño nun acto que se celebrará no salón de actos da Facultade de Ciencias Económicas e Empresariais do campus vigués. A cerimonia terá lugar a partir das 12.30 horas e será presidida polo titular da Xunta, Alfonso Rueda. O acto comezará coa intervención do reitor en funcións, Manuel Reigosa, e logo lerase o decreto de nomeamento de García Mateo, a primeira reitora da institución académica viguesa nos seus 36 anos de historia.
A nova reitora recibirá de mans do seu antecesor a medalla e o bastón de mando e, tras o seu discurso, procederase ao nomeamento do seu equipo. O presidente da Xunta pechará o acto, antes da interpretación do ‘Gaudeamos igitur’.
Na reunión do Consello de Goberno da UVigo, celebrada este martes, o reitor en funcións avanzou a data deste acto e confirmou que o traspaso de poderes co novo equipo de goberno “xa está en marcha e desenvólvese con normalidade”.
