A Universidade de Vigo (UVigo) e a multinacional de servizos ambientais Veolia crearon a Cátedra Convive coa vocación de impulsar “un cambio de paradigma” na contratación pública. O reitor da UVigo, Manuel Reigosa, e o director executivo de Veolia Auga Galicia, Nicolás Esmorís, foron os encargados de asinar este martes o convenio de colaboración entre ambas as entidades para crear esta cátedra, que será “un punto de partida para continuar colaborando nos retos maiúsculos que ten a contratación pública, que pesa un 10% do PIB nacional”, segundo dixo Esmorís.
“A Cátedra Convive é unha iniciativa da UVigo e Veolia que aspira a situarse como referente en España no estudo e a mellora da compra pública responsable, que nace coa vocación de impulsar un cambio de paradigma na contratación pública, orientándoa cara a modelos máis eficientes, transparentes e aliñados con grandes retos globais, especialmente os vinculados á Axenda 2030 e aos Obxectivos de Desenvolvemento Sustentable”, apuntou a directora da cátedra, Patricia Valcárcel.
Pola súa banda, o reitor puxo en valor a importancia de “tender lazos” entre a sociedade civil e a universidade. “Poucas veces asínase un acordo que teña tan claramente establecidas as liñas de actuación, que son moi positivas”, apostilou Reigosa. Concibida como un espazo estable de colaboración entre o ámbito académico e o tecido empresarial, a Cátedra Convive céntrase no desenvolvemento de solucións innovadoras que permitan integrar criterios sociais, ambientais e tecnolóxicos nos procesos de contratación pública, con especial atención a sectores estratéxicos como a xestión da auga, os residuos e a enerxía.
Entre os obxectivos desta iniciativa están a xeración de coñecemento aplicado, a mellora de procedementos administrativos, a profesionalización dos operadores implicados e a creación dun ecosistema de colaboración que sexa capaz de conectar universidade, empresa e institucións públicas. “Todo isto co propósito de contribuír a unha contratación pública que non só sexa máis eficaz, senón tamén motor de desenvolvemento sustentable, innovación e valor compartido no territorio”, resumiu Valcárcel, segundo recolle o Diario da Universidade de Vigo (DUVI).
