O conselleiro de Presidencia, Xustiza e Deportes, Diego Calvo, participou este xoves no acto de presentación das actividades organizadas con motivo do 120 aniversario do Real Club Náutico de Vigo, e destacou o papel da entidade como “referente deportivo e social” da cidade olívica. Durante a súa intervención, Diego Calvo destacou o papel dinamizador do Náutico na vida da cidade, e tamén puxo en valor o traballo formativo con nenas e nenos durante varias xeracións.

Respecto diso, lembrou que ese labor estivo na orixe da traxectoria de destacados deportistas olímpicos e paralímpicos, como Tamara Echegoyen, Nicolás Rodríguez ou Martín de la Puente. O conselleiro trasladou ao club o seu parabén por estes 120 anos de historia e sinalou que 2026 será un ano “moi especial”, con numerosos actos conmemorativos, que axudarán a estreitar os lazos do Náutico coa cidadanía viguesa e co deporte galego.