O alcalde de Vigo, Abel Caballero, avanzou que o goberno local aprobará o vindeiro venres, día 10 de abril, os pregos e as bases do acordo de concesión directa do estadio de Balaídos ao Real Club Celta. O rexedor dixo que na próxima xunta de goberno local aprobaranse as bases desta concesión directa de usos da devandita infraestrutura deportiva. Terá un período de 50 anos prorrogable ata os 75 e a entidade celeste poderá utilizar o campo “para fins deportivos, para fins terciarios e para fins complementarios”. Abel Caballero referiuse a Balaídos como “a principal icona deportiva” de Galicia, destacando que se trata dunha “gran decisión e unha gran medida”. “Estou moi satisfeito e cando en Vigo operamos desde o diálogo e a unidade, sacamos as cousas adiante”, sentenciou.