Un equipo científico do Centro de Investigación Mariña (CIM) da Universidade de Vigo logrou, por primeira vez no mundo, desenvolver un protocolo eficaz de criopreservación de larvas de medusa. Este avance pioneiro permitirá transformar as estratexias de conservación da biodiversidade e avanzar en novas liñas de investigación en bioloxía e acuicultura. O traballo, desenvolvido polo laboratorio Cryolab do grupo Ecocost, foi publicado na prestixiosa revista científica Cryobiology.
Os investigadores Alba Lago, Jesús Troncoso e Estefanía Paredes lograron demostrar que é posible conxelar e recuperar con éxito as éfiras, que son a primeira fase larvaria da medusa Aurelia aurita. Ata o de agora, a criopreservación aplicárase con éxito noutros invertebrados, pero o caso das medusas resultaba especialmente complexo polo seu alto contido en auga. O proceso baséase nunha combinación de crioprotectores e tratamentos de desconxelación que permiten que as larvas manteñan a súa integridade celular.
No artigo publicado, o equipo propón este organismo como un novo modelo animal para entender a criopreservación de tecidos con gran presenza de líquidos. Segundo explica Estefanía Paredes, o impacto de controlar o arrefriado nestes tecidos axudará a entender como protexer mellor outros organismos de interese local como o mexillón, a ameixa ou o berberecho. O reto principal foi atopar o equilibrio para que os crioprotectores non resultasen tóxicos e evitar a formación de cristais de xeo que destruirían as células.
POSIBILIDADES ABERTAS
Este avance abre novas posibilidades para a conservación do zooplancto gelatinoso, unha peza clave no funcionamento dos ecosistemas mariños e nas cadeas tróficas oceánicas. A capacidade de conservar estes organismos a longo prazo permitirá a creación de bancos biolóxicos para protexer a biodiversidade fronte ao cambio climático e a contaminación. Ademais, facilitará o coñecemento da bioloxía dos cnidarios e o desenvolvemento de novos modelos experimentais aplicables á acuicultura e á xestión de recursos mariños no futuro.
