Un camión do lixo incendiouse na madrugada deste mércores en Vigo, deixando toda a súa carga esparexida en plena rúa García Barbón. Segundo fontes do 112 consultadas por Europa Press, foi sobre as 03:15 horas cando o Centro Integrado de Atención ás Emerxencias recibiu unha chamada asegurando que un vehículo de recollida de lixo estaba a arder en plena vía pública.

Por iso, rapidamente deuse aviso á Policía Local e aos Bombeiros de Vigo. Estes últimos explicaron que non ardeu a cabina do camión, senón toda a parte traseira onde se almacena a carga. Testemuñas presenciais informaron de que foi necesaria a apertura manual do camión e deixar saír todo o lixo á calzada para poder apagar as chamas con eficacia.

Pola súa banda, o vehículo puido abandonar o lugar polo seu propio pé, sen necesidade de ser remolcado tras a intervención dos servizos de extinción. Ademais, cabe destacar que, malia o aparatoso do incidente e a gran cantidade de residuos que quedaron sobre o asfalto, non houbo que lamentar danos persoais.