O goberno municipal do Vigo cualificou como “insidias” e “mentiras” as críticas do PP local, que vincularon aos socialistas vigueses coa “corrupción sanchista”, e defendeu a súa “honradez”. En declaracións remitidas aos medios, o portavoz municipal socialista, Carlos López Font, afirmou que “o PP de Vigo está tan desesperado que ten que facer política baseada na mentira”. “A honradez deste goberno é total. Toda a cidade o sabe, porque todo o mundo nos coñece”, proclamou o edil, que engadiu que “agora, o diñeiro público desta cidade gástase onde se ten que gastar, na cidade”.

López Font denunciou que o PP vigués está “instalado na calumnia” e “tentando difundir mentiras que nin eles mesmos se cren”, mentres que o goberno local traballa “con honestidade e responsabilidade”. “Insidias, insidias e insidias. Isto é o Partido Popular de Vigo”, resolveu. As palabras de portavoz do goberno local responden as manifestacións realizadas este mesmo xoves pola presidenta do PP de Vigo, Luisa Sánchez, que lamentou que o PSOE vigués “puxo a alfombra vermella á corrupción sanchista”, recibindo e agasallando a persoas agora investigadas por supostas prácticas irregulares, como José Luís Ábalos, Isabel Pardo de Vera e Leire Díez (da que amosou unha foto nun acto xunto a Carmela Silva en 2022, cando a edila viguesa era presidenta da Deputación de Pontevedra e Díez era responsable de Relacións Institucionais e Filatelia de Correos).