A conselleira de Medio Ambiente e Cambio Climático, Ángeles Vázquez, visitou este martes a planta de transferencia de residuos de Guixar, en Vigo, e cifrou en 4,3 millóns de euros as axudas concedidas ao Concello olívico para que mellore a xestión dos seus residuos. Segundo sinalou, o Concello de Vigo é un dos máis beneficiados polas distintas axudas convocadas polo Goberno galego para apoiar ás entidades locais na súa xestión.
Deste xeito, só este ano a Xunta concedeulle 1,5 millóns de euros para a recollida de materia orgánica e residuos domésticos e voluminosos. Estas achegas serviron para a adquisición de tres camións de recollida separada de biorresiduos, composteiros, e outras actuacións. Entre 2023 e 2024, o Concello de Vigo recibiu máis de 2,3 millóns de euros en distintas liñas de axudas, destinados á adquisición de camións, colectores para materia orgánica, caldeiros, bolsas e sacos, composteiros e kits de compostaxe, campañas de información, etc.
Ángeles Vázquez incidiu en que estas axudas se suman a outras medidas de apoio, como o investimento de máis de 3,5 millóns de euros na planta de Guixar entre 2024 e 2025. Con todo, a conselleira apuntou que hai unha parte da actuación que aínda non está en funcionamento, e é a tolva para biorresiduos, pendente dun informe de ruídos por parte do Concello.
