O xulgado do contencioso administrativo 2 de Vigo ditou sentenza na que desestima un recurso da sociedade concesionaria do hospital Álvaro Cunqueiro e valida a liquidación do IBI correspondente a 2020 realizada polo Concello, de 1,1 millóns de euros.
A concesionaria reclamaba a anulación desa liquidación por considerala contraria a dereito, xa que entendía que o IBI se calculou sobre unha base impoñible non adecuada. Respecto diso, defendía que non é titular da totalidade do inmoble e que, por tanto, o imposto municipal calculouse erroneamente e era superior ao que lle correspondería pagar.
Con todo, o xulgado sinalou que a valoración catastral do inmoble, do que a sociedade ostenta “o cento por cento da titularidade dunha concesión administrativa” para servizos non hospitalarios, adquiriu firmeza, ao non ser cuestionada no seu momento, e por tanto o Concello ten que recadar ese imposto.
Ademais, anada que non se produciu ningunha circunstancia, como podería ser un cambio na clasificación do chan, que leve a modificar de forma extraordinaria o valor catastral. Por iso, declarou que a liquidación do IBI realizada polo Concello é conforme a dereito, aínda que contra esta sentenza cabe recurso de apelación ante o Tribunal Superior de Xustiza de Galicia (TSXG).
VALORACIÓN DE ABEL CABALLERO
O alcalde de Vigo, Abel Caballero, valorou que o Concello “segue gañando sentenzas”. Segundo trasladou, nunhas declaracións gravadas e remitidas aos medios, a concesionaria pretendía pagar “só pola cafetaría, lavandaría, aparcadoiros, pero non polas instalacións hospitalarias”.
“Claramente a resolución do xulgado contencioso administrativo número 2 di que a empresa ten a concesión do 100 % e por tanto ten que pagar o IBI polo 100 %, polo total da concesión”, subliñou o rexedor.
Caballero lembrou que o importe dese pago “é moi importante”, de 1.109.000 euros e trasladou a súa “sorpresa” porque “a Xunta de Galicia apoia á concesionaria para que non pague o IBI á cidade de Vigo”. “A Xunta de Galicia sempre en contra dos intereses de Vigo”, proclamou.
