O Xulgado do Penal 1 de Vigo condenou a catro persoas a penas de 4 a 8 meses de prisión por estafar a unha empresa viguesa máis de 17.000 euros mediante a suplantación electrónica de identidade dun dos seus provedores (técnica coñecida como phishing).

A sentenza foi ditada tras unha vista de conformidade na que os catro procesados —conectados por videoconferencia dende Granada, Fuenlabrada, Torrexón de Ardoz e Murcia— recoñeceron os feitos, o que motivou que a Fiscalía rebaixase a súa petición inicial de pena. Finalmente, dous dos acusados foron condenados a 8 meses de cárcere como autores do delito de estafa, mentres que os outros dous foron condenados a 4 meses de prisión como cómplices.

O delito produciuse entre febreiro e marzo do ano pasado, cando a empresa prexudicada recibiu correos que, en aparencia, eran do seu provedor, informando dun cambio de conta bancaria para ingresar os pagos. A empresa realizou transferencias por máis de 17.000 euros ás contas dos acusados, pero o engano foi descuberto cando o verdadeiro provedor confirmou que non cambiara o seu número.

A execución das penas de prisión foi suspendida durante dous anos, coa condición de que os condenados non volvan delinquir nese tempo e que paguen as indemnizacións correspondentes á empresa estafada pola cantidade da que se apropiaron.