O presidente da Xunta, Alfonso Rueda, anunciou este xoves que a próxima semana comezarán de forma inmediata as obras da futura residencia pública autonómica de maiores en Vigo, proxecto impulsado pola Fundación Amancio Ortega nos terreos da antiga ETEA.

Rueda subliñou a necesidade de “axilizar e pisar o acelerador” no proceso para que a residencia sexa unha realidade canto antes, destacando o compromiso do Goberno galego coa atención aos maiores e coa cidade de Vigo.

A nova infraestrutura contará con 150 prazas públicas e estará dotada de tecnoloxía avanzada, ademais de servizos médicos, salóns sociais e cociña. Esta residencia forma parte das sete que a Fundación constrúe nas sete cidades galegas —cun investimento total de máis de 180 millóns de euros e a creación de 900 prazas públicas—, centros que Rueda cualificou de “referente na atención aos maiores en toda España”.

O de Vigo foi o último proxecto en iniciarse debido aos “atrancos á urbanización da zona”. A Xunta segue á espera de que o Concello de Vigo e a Zona Franca asinen o convenio acordado para urbanizar o viario principal da ETEA cun investimento autonómico de 10,5 millóns de euros.