Un home de 81 anos de idade aceptou unha pena de seis meses de cárcere como autor dun delito de exhibicionismo por tocarse os xenitais diante dunha menor cando ambos viaxan nun bus urbano da cidade de Vigo.

Así, o home recoñeceu os feitos e aceptou a pena nunha vista de conformidade levada a cabo no Xulgado do Penal número 2 de Vigo, que lle impuxo tamén o pago de 300 euros á menor por danos morais. Ademais, o octoxenario non poderá achegarse a menos de 200 metros da vítima durante 2 anos nin desenvolver profesión ou oficio que leve contacto regular con menores nos próximos 3 anos. A pesar de todo, o home non ingresará en prisión se non delinque durante 2 anos.

Os feitos ocorreron na tarde do 23 de novembro de 2023, cando o acusado viaxaba no bus sentado diante da nena, de 14 anos. Mentres trataba de taparse cun maletín de ordenador para non ser visto polo resto de pasaxeiros, comezou a tocarse os xenitais por encima da roupa, á vez que “miraba fixamente para a nena, achegándolle os seus pés, chegando a rozarlle as pernas”.

Por estes feitos, o ministerio público pedía ata 9 meses de cárcere e prohibirlle viaxar en bus urbano durante dous anos. Finalmente, a pena foi de 6 meses e si poderá usar o autobús.