O Tribunal Superior de Xustiza de Galicia (TSXG) estimou parcialmente un recurso de suplicación interposto por unha profesora do Conservatorio Profesional de Música de Vigo (CMUS) polo retraso na activación do protocolo ante unha denuncia por suposto acoso laboral.

A traballadora solicitara a activación do protocolo a principios de outubro de 2022, pero a Consellería de Educación arquivou a solicitude dúas semanas despois. Tras presentar unha demanda xudicial en xuño de 2023, o Xulgado do Social de Vigo absolveu a Consellería.

Non obstante, o TSXG reverteu parcialmente esta decisión ao entender que a Consellería de Educación “incumpriu a normativa de prevención de riscos laborais”, xa que só activou o protocolo e emitiu o informe despois de que a funcionaria presentase a demanda.

O alto tribunal galego condenou a administración autonómica a abonar 7.501 euros á profesora por esta “infracción en materia de prevención de riscos laborais”.