O Tribunal Superior de Xustiza de Galicia (TSXG) rexeitou o recurso de apelación interposto por un veciño de Vigo contra unha sentenza do Contencioso Administrativo número 2 da cidade, que xa rexeitou a súa denuncia contra o Concello por supostamente non adoptar medidas para paliar os ruídos e molestias ocasionados polas actividades do Nadal 2022-2023.

En marzo pasado, o tribunal vigués desestimou o recurso presentado por este veciño, e sinalou na súa sentenza que o Concello si adoptou medidas para minimizar o impacto do ruído, recollendo incluso esas prevencións nos pregos de condicións para a instalación das atraccións.

Fronte a esa resolución, o denunciante presentou recurso de apelación e agora o TSXG rexeitouno, impondo as costas de 1.000 euros ao apelante. No seu recurso, este veciño argumentaba que o Contencioso Administrativo incorrera nun erro na valoración da proba, pero o alto tribunal galego rexeitou dito extremo.

Ao contrario, valida as razóns do xulgado vigués e subliña que se puido constatar que “non houbo inactividade” por parte do Concello e que existían medidas para limitar os efectos e molestias do ruído. Tamén expón que “unha sensación de ruído” non pode servir “como proba obxectiva”.

O NADAL DE VIGO “NON SE PECHA”

Ante esta sentenza do TSXG, o alcalde da cidade olívica, Abel Caballero, trasladou a súa satisfacción porque o Tribunal “dá a razón ao Concello” nunha resolución “contundente”, e proclamou que “aqueles que queren pechar o Nadal de Vigo, que saiban que non o van a conseguir, fagan o que fagan e inventen o que inventen”.

Para o rexedor, “o Nadal de Vigo é un feito de importancia mundial e os que a queren pechar, o PP, o Bloque e algunha xente concreta dalgunhas zonas, que se esquezan”. “Non o van a conseguir”, resolveu.

Ademais deste procedemento, o xulgado do Contencioso Administrativo 1 de Vigo xa avalou nun auto que o Concello cumprira a sentenza do TSXG que o condenaba polas molestias que o Nadal de 2022-23 xerara unha veciña. A recorrente solicitou a execución da devandita sentenza e o xulgado declarou en abril pasado que xa se tomaron medidas para reducir o impacto sonoro dos festexos.

ALAMEDA, QUE SEXA BIC

Por outra banda, a Asociación de Veciños Zona Centro de Vigo solicitou á Xunta que inicie os trámites para declarar a Alameda da cidade, na Praza de Compostela, como Ben de Interese Cultural (BIC), un espazo que actualmente xa está catalogado como xardín histórico e protexido pola Lei de Patrimonio Cultural de Galicia.

Esa condición, explicaron os veciños nunha rolda de prensa, obriga á administración a protexelo, pero denunciaron que “non existe esa protección” porque as actividades que se promoven e se atorizan na Alameda, entre elas o mercadillo de Nadal, “provocaron un dano irreparable en todo o conxunto”.

Así, lembraron que o Concello cede grauitamente eses xardíns a un grupo de empresarios para desenvolver o chamado Cíes Market, unha actividade mercantil “orientada ao seu exclusivo beneficio”. Deste xeito, durante os dous meses que dura a campaña do Nadal, a Alameda convértese “nunha feira multitudinaria de comida e bebida”, coa instalación dun centenar de casetas “aparentemente sen ningún tipo de control sanitario”.