O secretario xeral do PSdeG, José Ramón Gómez Besteiro, manifestou que o Hospital Álvaro Cunqueiro de Vigo é “unha oportunidade perdida para o público“, no día en que se cumpren 10 anos da súa posta marcha, mentres que o portavoz parlamentario do PPdeG, Alberto Pazos Couñago, celebrou que o centro hospitalario sexa “referencia nacional e internacional”.

En declaracións aos medios, o líder do PSOE galego apuntou que se cumpren “10 anos dunha oportunidade perdida” e da posibilidade de “un gran hospital que quedou mermado”, ademais de “cuns sobrecustos que aínda hoxe é incapaz de explicar o PP”.

Nesta liña, lamentou que a Comisión de investigación aberta no Parlamento “pechouse sen resultados” porque o PP “non quixo que houbese luz sobre este asunto”. “O que queda aí é un hospital con menos camas, menos capacidade pública e uns sobrecustos salvaxes e absolutamente inasumibles”, reprochou.

Tamén criticou que “aínda” se siga “pagando a factura dese pequeno hospital de Vigo” e, este venres, dixo, “había que celebrar o 10º aniversario do gran hospital que se deseñou na época socialista” e que “se deseñou pensando nunha gran área hospitalaria, pensando en moitos máis servizos, con máis camas, con máis eficiencia e maior resposta pública nesa sanidade que era o gran modelo da sanidade pública”.

En definitiva, unha década que, segundo Besteiro, “lonxe de celebrar” deberíase “lamentar esa operación de privatización dun gran hospital” que pensaban que “debía ter e merecía Vigo e a provincia de Pontevedra”.

Pola súa banda, nunha comparecencia ante os medios este venres, o portavoz parlamentario do PPdeG puxo en valor os 10 anos do centro hospitalario vigués, como “o gran hospital público de Vigo” e cunha obra que, engadiu, énchelle ” de satisfacción” ao “ver cumprido o obxectivo de dotar a esta área sanitaria dun hospital público que hoxe xa é referencia a nivel nacional e internacional”.