A banda de rock estadounidense The Black Keys actuará no auditorio de Castrelos de Vigo o próximo 21 de xullo, nun concerto enmarcado dentro do programa Vigo en Festas organizado polo Concello. O alcalde, Abel Caballero, anunciou a duodécima confirmación dos concertos deste verán, cunha “banda fantástica” formada en 2001 por Dan Auerbach (voz e guitarra) e Patrick Carney (batería).
Sendo un dos grupos máis populares do “garage rock” na década de 2010, contan con 8,7 millóns de oíntes mensuais en Spotify. Únense así ao resto de artistas que visitará Castrelos este verán: Ana Belén (12 de xullo); Gente de Zona (17 de xullo); Trono (18 de xullo); The Black Keys (21 de xullo); Rozalén (24 de xullo); Coral Casabranca (26 xullo); Vanesa Martín (31 de xullo); Ópera A Traviata (1 de agosto); Jason Derulo (3 de agosto); Ópera Turandot (9 de agosto); UB feat. Ali Campbell (15 de agosto), e India Martínez (16 de agosto).
