O goberno municipal de Vigo esixiu este mércores saber “como e cando” a Xunta fixo as análises das augas que impediron que a praia de Samil obtivese o distintivo de bandeira azul.

En declaracións remitidas aos medios, a concelleira de Medio Ambiente, Nuria Rodríguez, lembrou que os areais da cidade conseguiron 12 dos 13 recoñecementos aos que aspiraba, e segue sendo a cidade de España “con máis bandeiras azuis”.

Con respecto á bandeira de Samil, a concelleira socialista explicou que os resultados das analíticas realizadas pola Xunta impediron obter ese distintivo, porque “os exames mostran que a auga na desembocadura do Lagares é moi bo, pero para obter ese recoñecemento ten que ser excelente”.

“O ano que vén conseguiremos, sen dúbida, ese decimotercer distintivo ambiental, pero agora queremos saber como e cando fixo a analíticas a Xunta. O Goberno autonómico sempre no medio, que casualidade!”, proclamou Nuria Rodríguez.

RESPOSTA DA XUNTA E DO GRUPO MUNICIPAL DO PP

Ante estas manifestacións, a Consellería de Medio Ambiente e Cambio Climático lembrou que “a concesión de bandeiras azuis corre a cargo dunha entidade independente, a Asociación de educación ambiental e do consumidor (Adeac)” e que non é, “en absoluto”, unha responsabilidade da Xunta.

Sobre a situación de Samil, o goberno galego lembrou a súa participación na construción da EDAR, na que se achegaron fondos europeos (a través do organismo estatal Acuaes) e fondos autonómicos, ademais da achega dos terreos por parte do Concello.

“O Concello de Vigo debería depor a súa actitude de hostilidade permanente cara á Xunta, á que trata de culpabilizar de todos os seus problemas, e facer autocrítica. Posúen información de primeira man sobre o estado da praia de Samil, e é o seu labor emendar a situación para que, en 2026, poida optar a ser recoñecida coa Bandeira Azul”, sentenciaron fontes da Consellería.

Pola súa banda, o grupo municipal do PP lamentou que Vigo perdese esa bandeira azul no seu areal máis emblemático “pola incompetencia” do goberno local, xa que a responsabilidade de conseguir o distintivo corresponde “directa e intransferiblemente” ao Concello, que “debe manter a calidade das augas”.

O portavoz dos ‘populares’, Miguel Martín, que acusou a Caballero de “esconderse” detrás da concelleira de Medio Ambiente, en lugar de anunciar as bandeiras el mesmo, como cada ano, lembrou que a Xunta “unicamente mide a calidade das augas”. “Caballero sábeo e precisamente por iso, unha vez máis, non deu a cara”, incidiu.

Nun segundo audio, a concelleira de Medio Ambiente insistiu en que “os ríos son competencia da Xunta” e se a perda de bandeira azul é pola calidade da auga na desembocadura do Lagares, “claro que é competencia da Xunta”. “Témosllo que lembrar ao PP de Vigo?Non se decatou diso aínda”?, proclamou.

A normativa vixente establece que son os concellos os encargados da limpeza e mantemento das canles dos ríos nos tramos urbanos; no caso das desembocaduras no mar, estar a falar de dominio público marítimo terrestre que, en Galicia, e ata o 1 de xullo, é competencia estatal.