O XII Congreso Nacional de Organizacións de Maiores, celebrado desde este xoves en Vigo, clausurouse este venres cunha chamada a acabar co edadismo, que é unha “enfermidade silenciosa”, e co paternalismo cara a eles. Ademais, anunciouse que o próximo congreso será en Santander en 2027.

Esta foi unha das conclusións deste evento, celebrado na sede de Afundación na cidade olívica, no que participaron durante dúas xornadas 800 acreditados, máis de 37 organizacións e unha vintena de directivos en empresas. Segundo informa a Confederación Española de Organizacións de Maiores (Ceoma), entidade organizadora do congreso, as sesións reuniron a profesionais do sector que abordaron cuestións como o edadismo, os malos tratos dos maiores, o talento senior, o envellecemento activo e o traballo máis aló dos 50 anos.

Ceoma pediu desde Vigo eliminar o paternalismo e acabar co edadismo, que é “unha enfermidade silenciosa”. A confederación insistiu tamén na necesidade de contar cun tratado para as persoas maiores que teña en conta os seus dereitos e cun sistema de xubilación flexible, que permita ás persoas que así o desexen poder seguir traballando.

Así mesmo, Ceoma fixo fincapé na importancia do dereito a decidir dos maiores no que fai referencia ao seu coidado e na “invisibilidade dos malos tratos, tanto o institucionalizado como o que se produce no ámbito familiar”. A sexualidade das persoas maiores tamén foi unha das cuestións que se abordaron nas mesas de debate, especialmente no caso das persoas que están a vivir en centros ou residencias. Neste sentido, os especialistas reunidos no congreso coinciden en que non se teñen en conta as súas necesidades.

“APROVEITAR O TALENTO SÉNIOR”

Durante o seu discurso de clausura, o presidente de Ceoma, José Luís Fernández Santillana, insistiu na importancia de “aproveitar o talento sénior” e que se valore ás persoas pola súa capacidade e non pola súa idade. Tamén apostou polo traballo intergeneracional e por “non facer guetos de mozos nin de maiores”.

Fernández Santillana destacou o valor do envellecemento activo e puxo como exemplo ao papa Francisco, que “marchou traballando”. Nesta liña, sinalou que para que os maiores poidan facer exercicio e manterse activos “é importante contar con espazos e cidades amigables“. Tamén acudiu a este congreso o director xeral de Maiores e Atención Sociosanitaria da Xunta, Antón Acevedo, quen reivindicou medidas que levará a cabo desde o seu departamento, como o impulso de estratexias contra o edadismo e a soidade non desexada.