Os servizos de emerxencias tiveron que evacuar ao Hospital Álvaro Cunqueiro de Vigo a un pasaxeiro dun cruceiro por un posible infarto.

Segundo informou o 112 Galicia, efectivos de Salvamento Marítimo e do Servizo de Gardacostas de Galicia coordinaron o rescate do pasaxeiro que se atopaba nun cruceiro que navegaba entre Baiona e A Guarda.

Tal e como trasladaron os servizos de emerxencias ao Centro Integrado de Atención ás Emerxencias (CIAE-112), Gardacostas puña en marcha pasadas as 18.40 horas o helicóptero Pesca 1 para acudir en auxilio desta persoa, que necesitaba asistencia médica urxente.

O cruceiro no que viaxaba –Sky Princess–, detallou o 112 Galicia, atópase a escasas millas de Vigo, entre as localidades pontevedresas de Baiona e A Guarda.