O comisionado do Corredor Atlántico, José Antonio Sebastián Ruiz, cualificou de “moi necesaria” a chegada do tren á terminal de Bouzas, en Vigo, “no menor prazo posible” para dar “versatilidade” ao Porto da cidade olívica.
Así o sinalou este xoves ante os medios de comunicación antes de participar nun xantar-coloquio organizado polo Círculo de Empresarios de Galicia, onde dixo que na actualidade na contorna de Vigo hai “moitos problemas” de accesos ferroviarios, como o da Plataforma Loxística Industrial de Salvaterra-As Neves (Plisan) ou o da terminal portuaria de Bouzas.
Segundo el, xa están “nunha planificación avanzada”. “Si que queremos levar o tren a Bouzas e á Plisan”, reivindicou, explicando que o Estado acometerá estas infraestruturas “no menor prazo de tempo posible” porque son “moi necesarias”.
Todo iso tras reunirse esta mañá co presidente da Autoridade Portuaria, Carlos Botana, e con representantes de empresas como Grupo Davila. Sebastián Ruiz insistiu en que o Porto “podería recibir moitos máis vehículos” e podería seguir crecendo e transportar coches a través do ferrocarril.
“Estamos completamente de acordo con iso”, sentenciou, pondo en valor a importancia de reunirse con empresas para “escoitar” as súas necesidades.
Precisamente o comisionado falou da conexión do Porto de Vigo coa rede de autoestradas ferroviarias de España, que piden Transglobal xunto á Autoridade Portuaria e a Grupo Davila. El dixo que é importante estudar a proposta porque é “necesaria” para Galicia.
ABEL CABALLERO REXEITA A CONSTRUCIÓN NA TERMINAL DE BOUZAS
O alcalde de Vigo, Abel Caballero, reiterou este xoves o seu rexeitamento á construción dunha vía férrea desde a terminal portuaria de Bouzas, porque esa infraestrutura “rompería” a cidade e porque “Stellantis non o quere”; e asegurou que esa posición é compartida polo Ministerio de Transportes e Mobilidade Sustentable.
En declaracións remitidas aos medios, o rexedor olívico insistiu en que a terminal de Bouzas debe ser utilizada por Stellantis para a exportación de vehículos e a planta automobilística “non quere o tren a Bouzas”, senón que a terminal siga como ata agora, “porque se non, xa fixese ouvir a súa voz”.
Por outra banda, recalcou que esa infraestrutura “rompería” a cidade. “E iso xa non o tolero eu”, proclamou, e afirmou que “hai un acordo” e “está falado co secretario de Estado”, José Antonio Santano.
Segundo insistiu o alcalde, “xa está descartada calquera opción do tren a Bouzas porque, nin é conveniente, nin ten sentido común, e vai contra a industria da automoción e contra a cidade de Vigo”.
Nese sentido, Caballero explicou que esta posición xa lla trasladou ao Comisionado do Goberno para o Corredor Atlántico, José Antonio Sebastián, que este xoves en Vigo afirmou que a chegada do tren á terminal de Bouzas é “moi necesaria”.
Finalmente, o alcalde remarcou que o Ministerio coñece a súa posición e que está “absolutamente de acordo”. “Temos consenso e acordo absoluto. E niso imos seguir estando”, proclamou Caballero, que engadiu que ese tren “non se vai facer” e que o Porto xa ten tren, en Guixar, e “é aí onde hai que actuar e reforzar”.
