O portavoz municipal do BNG de Vigo, Xabier Pérez Igrexas, defendeu como “irrenunciable” o horizonte do ano 2030 para a chegada do AVE ao Porto desde a cidade olívica, criticando que o PP celebre “o atraso ao 2032”. “A Saída Sur é unha cuestión estratéxica para Vigo e para o conxunto do noso país e para permitir que a nosa área lidere a Eurorrexión Galicia-Norte de Portugal, avanzar nunha mellor vertebración do eixo atlántico e ampliar as sinerxías con Portugal, que xa é o noso principal socio a nivel comercial”, afirmou Igrexas, segundo recolle o Bloque nun comunicado.
Así, lamentou a posición adoptada polo PP, ao que acusou de celebrar “con gran xúbilo” o “atraso ao ano 2032” afirmado polo ministro de Infraestruturas luso, Miguel Pinto. Para Pérez Igrexas, este “xiro” é unha “contradición máis” dos ‘populares’. “Cremos que Luisa Sánchez se estrea da peor maneira como presidenta local do PP de Vigo, volvendo colocarse como mera sucursal de Xénova e como comisaria de propaganda da Xunta de Alfonso Rueda”, engadiu. Por iso, pediu ao alcalde, Abel Caballero, que lidere unha “resposta firme” convocando ao Consello Social da Cidade para urxir avances ao Goberno español.
Precisamente o rexedor volveu a enviar un novo audio aos medios de comunicación sobre este tema este venres, insistindo no “esperpento” e na “inutilidade política” do PP de Vigo e de Galicia. “O PP quería que o AVE Vigo-O Porto estivese acabado no ano 2030 como quere o Goberno de España (…). Agora reúnense co ministro de Portugal, fan un acto público e din que non, que no 2030 non, que mellor no ano 2032″, criticou Caballero.
Ante estas palabras, a presidenta do PP de Vigo, Luisa Sánchez, lembrou que xa en 1988 Caballero, cando era ministro de Transportes, prometeu o AVE a Vigo para 1993. “Agora pretende que nos creamos que o AVE a Lisboa vai estar en 2030”, ironizou, lembrando tamén que o rexedor prometeu que o Plan Xeral de Ordenación Municipal (PXOM) ía estar aprobado en 2024 e aínda non está en vigor. Ela pediu ao ministro Óscar Puente que acuda a Vigo a detallar o calendario de “compromisos e actuacións” sobre esta infraestrutura.
