O consello de goberno da Universidade de Vigo (UVigo) aprobará este venres o orzamento da entidade para 2025, que estará dotado de 248,3 millóns de euros, o que supón practicamente a mesma cantidade que en 2024 (-0,18%).

Así, este xoves a xerente Yolanda Lesmes foi a encargada de explicar as principais liñas das contas do ano que vén que, tras ser aprobadas polo consello de goberno, terán que ser referendadas polo Consello Social a semana que vén.

O proxecto de orzamentos foi presentado este xoves ante o claustro como “equilibrado e sustentable”, mantendo a “coherencia de gasto” dentro da senda marcada pola Xunta de Galicia para 2025 e nos próximos exercicios, segundo explica o Diario da Universidade (DUVI).

Lesmes indicou que baixo o paraugas destas contas seguirase avanzando na execución dos compromisos adquiridos no programa de goberno, pondo o foco nas actuacións en materia de consolidación de emprego, promoción profesional, substitución xeracional, internacionalización, desenvolvemento da investigación e infraestruturas.

En canto aos ingresos, as transferencias correntes representarán o 63% do total, con 156,4 millóns de euros, un 6% máis, mentres que as transferencias de capital supoñen un 18%, con 45 millóns. A variación de activos financeiros representa o 12%, con 29,2 millóns, que se complementan con contas menores como as taxas e prezos públicos, con 15,3 millóns e ingresos patrimoniais e variación de pasivos financeiros.

En canto a gastos, o principal será o de persoal, cun 59% do total, mentres que a segunda maior cifra é aquela ligada a investimentos, cun 23% do orzamento, ata 57,1 millóns. Os gastos correntes en bens e servizos suporán un 14% do total, con 35 millóns.

Entre outras cousas, durante a xornada tamén se presentou o informe anual do reitor, dando conta do cumprimento dos obxectivos das vicerrectorías nestes últimos 12 meses. Ademais, Manuel Reigosa anunciou os resultados conseguidos en I+D+i en 2024, con 29,1 millóns de euros.