Resposta Feminista, unha plataforma nada en Vigo coa vocación de convocar mobilizacións unitarias do feminismo vigués, anunciou que levará a cabo unha manifestación o próximo 25 de novembro, Día Internacional da Eliminación da Violencia contra as Mulleres, baixo a lema ‘Que a vergoña cambie de bando. Feminismo sen tregua’.
Esta organización, composta por máis de 50 mulleres individuais e unha ducia de entidades, chamou á cidadanía viguesa a saír á rúa o vindeiro luns, a partir das 19.00 horas desde Vía Norte, para acabar coa violencia machista.
Este ano, tal como indicaron nun comunicado, pretenden pór o foco na violencia sexual e na xustiza patriarcal, “agradecendo a xenerosidade e valentía das que expuxeron os seus casos publicamente”.
Ademais, quixeron chamar a atención sobre a responsabilidade das distintas institucións e gobernantes que “pretenden sacar rédito político da loita feminista, á vez que non nutren de recursos as ferramentas que existen para a loita contra a violencia machista desde os seus postos”.
Así, denunciaron o “intento de silenciar a voz” do feminismo autónomo por parte do Concello de Vigo, que “instrumentalizando” á asociación de asistencia ás mulleres en situacións de violencia machista pretende facer un acto institucional, “pisando o feminismo organizado e autónomo da cidade, ignorando todos os protocolos elaborados polo feminismo galego nas súas mobilizacións e tentando apagar os discursos incómodos para o poder”.
“Nun intento de camiñar xuntas, solicitamos unha reunión coa Rede de Mulleres Veciñal Contra vos Malos Tratos á que o seu representante acudiu acompañada por, entre outras mulleres, unha representante do PSOE municipal, a cal deixou clara a nula vontade por negociar unha convocatoria conxunta, negando a nosa participación activa na súa convocatoria”, lamentaron.
