A presentadora, actriz e modelo Diana Nogueira é, desde este martes, a nova madriña do Banco de Alimentos de Vigo para a Gran Recollida deste ano, que levará a cabo en decenas de supermercados de toda a provincia os próximos 22 e 23 de novembro.

O vicepresidente e o secretario da Fundación Provincial Banco de Alimentos, Polo Quinteiro e Eusebio Garre, respectivamente, impuxéronlle esta mañá o ‘peto azul’ que a acredita como a nova embaixadora da Gran Recollida.

“A elección de Nogueira como nova madriña por parte do noso Banco de Alimentos responde á súa proximidade e conexión profunda con Galicia. Cremos, sen dúbida, que o seu rostro é un dos máis coñecidos e queridos por parte do público e, precisamente, estamos convencidos que será un gran altofalante”, explicou Quinteiro, segundo recolle o organismo nun comunicado.

Emocionada, Nogueira agradeceu que se pensase nela para relevar no cargo ao último padriño, o futbolista Iago Aspas, ao que lle pediu que “seguise metendo goles” xa que ela encargarase agora “de meter alimentos nos carros e nas bolsas”.

A actriz mostrou o seu orgullo por ser a nova madriña da Gran Recollida, e poder así formar parte da “gran marea azul”, onde hai persoas cunha “enorme xenerosidade e empatía”. Tamén aproveitou a súa intervención ante os medios de comunicación para lembrar ao que foi ata fai moi pouco presidente de Banco de Alimentos, o falecido Iván Martínez.

“Aquí, hoxe, fáltanos unha persoa que eu tiven a honra de coñecer”, sinalou, pondo en valor todo o traballo que realizou na Fundación.