Un operario tivo que ser trasladado ao hospital tras ser atacado por un can nunhas instalacións de recollida e coidado de animais de Vigo. O home presentaba feridas as mans, antebrazos e pernas.
Segundo informou o 112, foi un particular o que alertou ao servizo ao redor das 10 horas, informando o suceso que se produciu na Subida da Madroa, en Teis. Nesta chamada indicaba que un can mordera a un traballador, que presentaba diversas feridas.
Desde a sala de operacións do 112 Galicia pasouse o aviso ao persoal do Servizo de Urxencias Sanitarias de Galicia-061, que mobilizaron unha ambulancia ata o punto para o traslado do ferido ao Hospital Álvaro Cunqueiro.
Neste operativo, tamén se solicitou a intervención dos axentes da Policía Nacional e Local e dos efectivos de Protección Civil.
