Un home que será xulgado este mércores na sala do Penal 2 de Vigo, enfróntase a un ano e medio de prisión e ao pago de indemnizacións por máis de 7.000 euros, por acosar supostamente a un empregado, ata o punto de que este sufriu un trastorno ansioso-depresivo.

Segundo o escrito de acusación pública, o procesado era no momento dos feitos, en 2022, encargado dunha empresa de mantemento que traballaba no centro comercial Vialia de Vigo. A vítima levaba pouco máis dun mes na empresa cando o acusado, “actuando con abuso do seu cargo e coa intención de atentar contra a dignidade do traballador”, mantivo con el “unha actitude de fustrigación e acoso”.

Así, dirixíase a el con insultos, chamándolle “inútil”, “mediocre”, “mentireiro” ou con expresións como “tes as neuronas en folga”, “non sabes traballar”, “convídoche a que che marches”, “este é parvo, imbécil, subnormal”, etc. Todo iso cunha actitude hostil e agresiva cara ao traballador, chegando a agarralo polo peito.

A Fiscalía expón que tamén o chamaba de forma insistente pedíndolle explicacións polo seu traballo, en ocasións ata 25 veces nun día, e obrigáballe a xustificarse e reportar as súas tarefas de forma continua.

Tras un ano de soportar esta situación, o traballador acudiu ao médico, que lle pautou un antidepresivo e un ansiolítico e, meses despois, ao persistir a actitude do encargado, pautoulle a baixa laboral.

Como consecuencia destes feitos, o traballador sufriu un trastorno ansioso-depresivo, mentres que a empresa sancionou ao encargado por infracción grave cometida contra varios traballadores, con suspensión de emprego e soldo durante 21 días. No caso do denunciante neste procedemento, o acusado non asumiu, instando un acto de conciliación ante o SMAC.

Por todo iso, o ministerio público considérao autor dun delito contra a integridade moral no ámbito das relacións laborais e dun delito de lesións; así, pide que sexa condenado a penas que suman un ano e medio de prisión, inhabilitación para exercer como encargado ou responsable de equipos de persoal por un ano, e a medida de afastamento da vítima por tres anos e medio.

Así mesmo, reclama que indemnice ao traballador en cantidades que suman algo máis de 7.200 euros polos prexuízos causados.