A Xunta de Galicia e a Universidade de Vigo (UVigo) acaban de iniciar unha nova campaña arqueolóxica na Illa do Faro, no arquipélago de Cíes, para obter información que permita profundar no coñecemento sobre a historia e a ocupación humana pasada neste espazo, que forma parte do Parque Nacional Marítimo-Terrestre das Illas Atlánticas.
A conselleira de Medio Ambiente e Cambio Climático, Ángeles Vázquez, e o director do equipo encargado da escavación, Adolfo Fernández, presentaron este mércores en Vigo estes traballos, que se prolongarán durante cinco semanas nun xacemento localizado o ano pasado no marco duns labores de sondaxe realizadas na leira de Casa Viladomar. Nese momento quedaron ao descuberto uns restos arqueolóxicos, probablemente de época galaico-romana.
Así, durante esa primeira exploración localizouse un muro, tégulas (tellas) e diverso material cerámico, como ánforas. A presenza de restos construtivos levou aos arqueólogos a determinar que o lugar ten interese para ampliar as tarefas de prospección.
A área de escavación proposta está localizada dentro do ámbito de protección catalogado na PXOM de Vigo, moi preto doutros xacementos xa coñecidos, como o conchero das instalacións forestais e o conxunto formado polo mosteiro, a necrópole e o convento de San Esteban.
A campaña arqueolóxica, denominada proxecto Sentinela, conta co apoio loxístico e económico da Consellería de Medio Ambiente e Cambio Climático, e ten como obxectivo catalogar, identificar e rexistrar o patrimonio cultural do Parque Nacional.
A intervención en Cíes completará as actuacións acometidas desde 2021 no areal de Bois, na illa de Sálvora; e na fábrica de salgadura de Canexol e en Cova do Lobo, ambas as na illa de Ons.
Ángeles Vázquez sinalou que, a pesar da “prudencia” coa que deben encararse este tipo de actuacións, está convencida de que a zona escollida para os traballos en Cíes “vai ser outro espazo moi interesante” para achegar información acerca das edificiones de época romana na illa e para “pór en valor” todo o patrimonio histórico e cultural do Parque Nacional.
Respecto diso, a conselleira garantiu a continuidade das prospeccións arqueolóxicas nas illas do Parque, tanto este ano como o que vén, para o que o seu departamento destinará 123.000 euros (en parte procedentes de fondos europeos). Deste xeito, a Xunta pretende “reconstruír” a historia deste espazo natural e dos seus primeiros moradores, e aumentar así o atractivo deste lugar para os visitantes.
