O alcalde de Vigo, Abel Caballero, criticou este xoves as palabras do conselleiro de Cultura, Lingua e Xuventude, José López, sobre Cíes: “Ou ten unha ignorancia absoluta sobre patrimonios da humanidade ou ten mala fe. Non sei que é peor”. Así o sinalou o rexedor olívico nun audio difundido aos medios de comunicación despois de que este mércores López asegurase aos xornalistas nunha visita ás Illas Cíes que unha candidatura deste arquipélago en solitario a patrimonio mundial da Unesco sería “inviable” xa que “perdería a unidade estrutural” do parque das Illas Atlánticas.
Respecto diso, Caballero tachou de “sorprendentes e incribles” estas declaracións, porque, segundo el, “todo o mundo sabe” que a proposta do Concello de Cíes Patrimonio da Humanidade “era de éxito”. O alcalde de Vigo volveu a asegurar que a Xunta presentou a súa candidatura para facer todas as Illas Atlánticas Patrimonio da Humanidade co obxectivo de “boicotear” a Cíes. El dixo que foi lanzada fai sete anos e “non se fixo nada” desde entón. Ademais, subliñou que “non sairá adiante” porque os habitantes de Ons non están de acordo. Por todo iso, Caballero pediu a López que “rectifique” ou que “demostre” o que dixo.
