A Xunta concedeu autorización ambiental integrada (AAI) ao proxecto para a instalación dunha planta de hidróxeno verde no Porto de Vigo.

Tal como informou o Goberno galego nun comunicado, o Executivo resolveu de forma favorable a solicitude de AAI da iniciativa Julio Verme Hidróxeno Porto de Vigo SL para a instalación desta planta.

Precisamente o Diario Oficial de Galicia (DOG) publicou este luns a resolución, tras analizar o expediente e os posibles impactos derivados. Así, a Xunta conclúe que o proxecto é viable medioambientalmente sempre que se cumpran as condicións sinaladas.

“Con esta resolución complétanse os pasos para que a instalación obteña os permisos ambientais necesarios para levar adiante o proxecto, dado que a súa posta en marcha fai que teña que ser sometido a unha autorización ambiental integrada”, lembrou o Executivo autonómico. A documentación recolle que a iniciativa consiste na construción e explotación dunha estación de dispensado público de hidróxeno con xeración de 2 megawatts de potencia.