O goberno municipal de Vigo esixiu este luns á Deputación de Pontevedra que faga público “de forma inmediata” o “documento de valoración de compra” do antigo Teatro Cinema Fraga, unha inmoble propiedade de Abanca e cuxa adquisición foi anunciada tanto pola institución provincial como polo propio presidente da Xunta, Alfonso Rueda, nunha operación cofinanciada por ambas as administracións.
Nunhas declaracións remitidas aos medios, o portavoz do goberno vigués, o edil socialista Carlos López Font, afeou ao presidente da Deputación, Luís López, que se atreveu “a afirmar que o Concello de Vigo non fixo nada nos últimos anos para pór o Teatro Cinema Fraga –que leva 17 anos pechado– a disposición dos cidadáns.
Segundo proclamou Font, “durante moitos anos, o Concello estivo pendente de Abanca, para saber que usos quería darlle ao edificio”. “Démoslle moitos anos de prazo, pero finalmente non lle deron uso algún. Axiña que como soubemos que non o ían a utilizar, o Concello mostrou ao propietario o seu interese”, asegurou.
O pasado mes de febreiro, no contexto da campaña electoral das eleccións galegas, o presidente da Xunta e entón candidato, Alfonso Rueda, anunciou en Vigo a adquisición do edificio. Precisamente, poucas horas despois, o goberno vigués saíu ao paso do devandito anuncio desvelando que o alcalde, Abel Caballero, mantivera “conversacións” para conseguir que Abanca cedese gratuitamente o antigo Teatro Cinema Fraga.
Nas súas declaracións deste luns, López Font insistiu en que Abanca debe pór o edificio “a disposición da cidade de forma gratuíta”, e reclamou á Deputación, como “institución pública”, que dea a coñecer o custo da operación “de forma inmediata”.
