O Partido Popular (PP) de Vigo solicitou ao goberno local que explique as funcións que desenvolvía o bombeiro falecido o pasado fin de semana nun edificio da Avenida de Beiramar, para aclarar se realmente realizaba tarefas que non lle correspondían e para as que non tiña formación obrigatoria pola “falta de persoal” que vive o corpo da cidade.
Nun comunicado, o concelleiro Fernando González Abeijón indicou que aproveitou a reunión do Consello da Xerencia de Urbanismo para requirir “toda a información dispoñible” sobre o tráxico suceso, aínda que a responsable desta área, María José Caride, non achegou este martes “ningún dato a maiores do que xa publica a prensa”.
Así, González Abeijón lamentou que, mentres o PP leva “moitos anos” esixindo que se dote aos bombeiros de máis recursos, o PSOE “traballe en ocultar información”.
“Un PSOE ao que lle preocupa tan pouco o corpo de bombeiros que non tivo reparos en saltarse o loito oficial o pasado domingo para irse á festa de Balaídos. O alcalde, Abel Caballero, non dubidou en irse con Carmela Silva e outros concelleiros a un ambiente festivo de celebración e cervexas. Mentres, a escasos metros, o bombeiro falecido estaba a ser velado polos seus seres queridos. Pouco máis se pode dicir desta lamentable actitude”, sentenciou.
ACCESO ÁS QUEIXAS
Por outra banda, o PP de Vigo tamén acusou este martes ao goberno local de Caballero de facer “caso omiso” á resolución da Comisión de Transparencia de Galicia, que estimaba o recurso presentado polo grupo municipal ‘popular’ para acceder ás queixas e denuncias presentadas polo corpo de bombeiros da cidade nas que se informa da falta de persoal e do incumprimento dos servizos mínimos decretados polo propio Concello.
González Abeijón explicou que este órgano galego, vinculado á Valedora do Pobo, estimou un recurso seu despois de que a Concellaría de Seguridade rexeitase achegar dita documentación ao PP.
A citada Comisión instou o goberno local a atender esa solicitude, como marca a normativa, e a remitir unha copia á entidade que preside María Dores Fernández Galiño. Con todo, o prazo legal establecido expirou e aínda non se fixo efectivo o envío dos documentos.
Por iso, González Abeijón criticou as “prácticas oscurantistas” do goberno municipal de Abel Caballero, que “nin sequera atendeu as múltiples resolucións e requirimentos” da Comisión de Transparencia de Galicia e da Valedora do Pobo para que resolva e dea acceso á información pública sobre a “mala xestión” do servizo de bombeiros. Unhas solicitudes que, tal como lembra, remóntanse ao pasado mes de xaneiro.
Desde esa data, a concelleira de Seguridade, Patricia Rodríguez, estivo “obstaculizando” o labor de control do PP de Vigo e mantendo unha posición “enrocada” mentres “ignora totalmente” á Comisión de Transparencia de Galicia e á Valedora do Pobo.
“Parece que a edil socialista reafírmase nas advertencias que soltou este luns no pleno cando dixo que non, que o goberno municipal non vai dar conta de nada á oposición. E díxoo sen rubor cando o corpo de bombeiros leva anos arrastrando unha nefasta xestión pública, que obrigou a Abel Caballero a retirar da Concellaría a Carlos López Font e a Elena Espinosa. Patricia Rodríguez, á que este luns puidemos ver superada pola situación, vai polo mesmo camiño”, engadiu González Abeijón.
