Tanxugueiras serán as encargadas de pór voz ao himno galego no regreso da Selección Galega de fútbol, que volve aos terreos de xogo o próximo 31 de maio para disputar un partido no estadio de Balaídos contra Panamá.

O trío galego anunciou a través dun vídeo colgado nas redes sociais pola Federación Galega de Fútbol que estarán en Vigo para interpretar o himno no partido da ‘Irmandiña’.

Baixo a dirección do adestrador vigués Diego Martínez, a Selección Galega regresa a finais de maio oito anos despois do seu último partido, disputado en Riazor en 2016 fronte a Venezuela.