O Xulgado do Mercantil 1 de Pontevedra acordou a homologación do plan de reestruturación presentado por Fandicosta, recentemente saída do preconcurso de acredores (cos que xa pactara este plan), o que dá vía libre á venda da planta de Domaio, en Moaña, á pesqueira Wofco.

No seu auto, no que se confirma unha débeda de case 78 millóns de euros, o xuíz sinala que os efectos da homologación “esténdense inmediatamente a todos os créditos afectados, aínda cando os acredores non votasen a favor, ao debedor e aos seus socios”. En consecuencia, nun eventual concurso non serán rescindibles á homologación xudicial o propio plan de reestruturación; os pagos ou desembolsos efectuados no curso ordinario da actividade empresarial ou profesional de Fandicosta; os actos ou operacións razoables e necesarios para a execución do plan de reestruturación e para o éxito da negociación cos acredores, dentro dos que se inclúen as vendas dos activos identificadas expresamente nunha das estipulaciones do plan.

Así mesmo, tampouco será rescindible nun eventual concurso o chamado Crédito de Emerxencia, outorgado pola entidade Wofco, por tratarse de financiamento interino e/ou de novo financiamento, dependendo do momento en que se dispuxo del.

Por outra banda, o xulgado acordou o sobresemento dos prodecimientos de execución de créditos afectados por este plan de reestructuracuón, e acordouse tamén o alzamento da suspensión dos procedementos de execución dos créditos non afectados.

A homologación do plan non afectará os contratos con obrigacións recíprocas pendentes de cumprimento e teranse por non postas as cláusulas contractuais que establezan a facultade da outra parte de suspender ou de modificar as obrigacións ou os efectos do contrato, así como a facultade de resolución ou a extinción do contrato polo mero motivo da presentación da solicitude de homologación ou a súa admisión a trámite, a homologación xudicial do plan ou calquera outra circunstancia análoga ou directamente relacionada coas anteriores.

“Os contratos que sexan necesarios para asegurar a continuidade da actividade empresarial e profesional de Fandicosta non poderán suspenderse, modificarse, resolverse ou terminarse anticipadamente con causa na existencia dunha eventual cláusula de cambio de control”, expón o maxistrado, que tamén aclara que os acredores que non votasen a favor do plan manterán os seus dereitos fronte a terceiros.

Con respecto aos que si votaron favorablemente, o mantemento dos seus dereitos fronte a terceiros obrigados dependerá do que acordasen con eles no seu momento (ou, na súa falta, da normativa aplicable).

No auto tamén se precisa que os efectos do plan de reestruturación “pódense estender, nas condicións previstas neste, ás garantías persoais ou reais prestadas por calquera outra sociedade do mesmo grupo non sometida ao plan de reestruturación, cando a execución da garantía poida causar a insolvencia da garante e da propia debedora”.

O auto do xulgado Mercantil 1 non é firme e, aínda que non cabe recurso, os acredores que non votaron a favor do plan poden impugnalo ante a Audiencia Provincial. Con todo, o xuíz sinala que o plan homologado “produce os seus efectos de inmediato e ten plena forza executiva”.