O grupo británico UB40 actuará este verán no auditorio de Castrelos de Vigo, segundo anunciou o alcalde, Abel Caballero, nun audio difundido aos medios de comunicación. Desta maneira, a banda inglesa únese ao cártel das Festas de Vigo que organiza cada verán o Concello cun concerto o 7 de agosto.

O rexedor indicou que se trata de “un dos grandes grupos da historia do reggae“, que conta xa con 45 anos de traxectoria, lembrando a gran fama que tiveron nos anos 80 e 90 do século pasado.

UB40 súmase a outros concertos xa anunciados en Castrelos, como o de Dani Fernández o 13 de xullo; o de Sen Senra o 25 de xullo; o de Víctor Manuel o 14 de agosto e o de Melendi o 17 dese mesmo mes.