O goberno de Vigo aprobará este martes de forma definitiva o convenio que compromete á promotora do Barrio do Cura a construír de forma unitaria a vivenda libre e a sometida a algún tipo de protección.

Nun audio gravado e remitido aos medios de comunicación, o alcalde, Abel Caballero, explicou que o Concello venderá á promotora o 10% do aproveitamento municipal do chan, valorado en máis de 758.000 euros, co obxectivo de garantir a construción de vivenda social para venda ou aluguer.

O convenio recoñece o dereito de reacollo das persoas ás que se lles expropiou a vivenda para a construción destes edificios. Tamén establece que a administración local ten dereito preferente de compra dos pisos de protección se a promotora opta por alugalos.