O BNG de Vigo urxiu ao goberno local de Vigo que mobilice uns 213 millóns de euros dos remanentes dos que dispón o Concello ante a “ameaza” do seu bloqueo este ano.
Nun comunicado, o portavoz nacionalista, Xabier Pérez Igrexas, advertiu que están en “risco” estes “inxentes recursos” pola previsible reactivación das regras fiscais, que foron suspendidas en 2020 pola pandemia.
“O alcalde, Abel Caballero, non deu resposta no que vai de ano ás reiteradas interpelacións formuladas polo Bloque para coñecer que medidas ten previsto adoptar para poder utilizar os remanentes”, lamentou Igrexas, lembrando que estes fondos non son “aforro”, senón resultado da “continua inejecución” dos orzamentos do Concello.
“Son recursos achegados polos vigueses que, pola falta de acción do goberno municipal, non retornan en forma de políticas públicas á cidadanía”, criticou o nacionalista.
Por iso, reiterou a urxencia de actuar ante esta situación, afeando ao PSOE de Vigo que rexeitase unha moción do BNG que pretendía mobilizar uns 100 millóns para fortalecer os servizos públicos e afrontar o “grave problema de vivenda” da cidade, entre outras accións.
