O Servizo Galego de Saúde (Sergas) destinará máis de 580.000 euros para duplicar o espazo dedicado ao servizo de hospitalización a domicilio do Álvaro Cunqueiro, que pasará de 158 a 300 metros cadrados.

Precisamente este mércores, o conselleiro de Sanidade en funcións, Julio García Comesaña, visitou as obras que xa comezaron no centro, que está previsto que duren tres meses e medio.

Segundo el, a hospitalización a domicilio é un recurso “moi valorado” polo Sergas e polos pacientes, agradecendo o labor dos profesionais que a realizan.

Para o titular de Sanidade, tratar aos pacientes na súa propia casa e coa mesma atención que se presta nun hospital tradúcese nunha mellor asistencia para as persoas que están en coidados paliativos ou en procesos infecciosos, que son os principais casos tratados nesta área.

As cifras de Comesaña apuntan a que nos últimos anos, o servizo con base no Cunqueiro atende anualmente a uns 800 pacientes, chegando a 5.630 en toda Galicia. Agora, esta ampliación está a levarse a cabo tendo en conta a opinión dos profesionais.

Julio García Comesaña dixo que esta ampliación forma parte dos 5,7 millóns de euros de investimento en melloras nos hospitais públicos de Vigo que foron comprometidos pola Xunta en abril de 2022.