Os ‘populares’ de Vigo, Mos e O Porriño uníronse este xoves para reclamar ao Goberno central un “arranxo integral” e un “mantemento digno” da autovía A-55 ao seu paso por estes municipios, e lamentaron que a falta de Orzamentos Xerais do Estado “conxele” a construción do túnel “proposto polo PP no ano 2018”.
O portavoz do grupo municipal do PP en Vigo, Miguel Martín, xunto aos alcaldes de Mos e O Porriño, Nidia Arévalo e Alejandro Lorenzo, visitaron a zona da autovía en Tameiga, xunto coa delegada territorial da Xunta (e presidenta da xestora do PP vigués), Ana Ortiz, e a vicepresidenta da Deputación de Pontevedra, Luisa Sánchez.
Os representantes do PP insistiron en denunciar o mal estado que presenta este viario, despois dun ano e medio tras os últimos arranxos do firme, e lembraron que o tramo de Tameiga é un dos de maior sinistralidade de España.
A solución pasar por un “arranxo en profundidade”, segundo o PP, pero iso non resolve todos os problemas dunha estrada que “acumula 9.000 accidentes e 4.500 feridos en 30 anos”. Por iso, pediron de novo a gratuidade da AP-9 no tramo entre Puxeiros e O Porriño, “mentres non se constrúe a alternativa en túnel proposta polo PP en 2018”. Con todo, lamentaron que esta opción quedou “conxelada” ao prorrogarse os Orzamentos Xerais.
Ademais, sinalaron a Abel Caballero como “cómplice” do Goberno e esixíronlle que “reclame con man firme os investimentos necesarios”, e criticaron o “evidente abandono” dos viarios de competencia estatal na provincia.
