O BNG de Vigo propuxo este xoves iniciar un proceso de remunicipalización dos servizos de abastecemento e saneamento de auga e bus urbano da cidade olívica, xa que no 2025 concluirán as prórrogas das dúas concesións privadas.
Nun comunicado, o portavoz nacionalista, Xabier Pérez Igrexas, avanzou que levará esta cuestión ás Comisións Informativas do Concello, que se celebrarán a semana que vén. El defendeu a necesidade de “fortalecer e alongar” os servizos públicos fronte ás políticas de recortes e privatizacións.
“A nivel municipal, esa aposta ten que materializarse en iniciar o proceso de remunicipalización que poña baixo xestión pública os principais servizos do Concello, para que deixen de ser fronte de lucro de grandes empresas e mellorando a calidade do servizo que se presta”, apuntou.
