Dez persoas permanecen investigadas como presuntos autores de danos en doce ambulancias cometidos na zona de Vigo durante a folga que viviu o sector o verán de 2023 en demanda dun novo convenio colectivo que durou ata mediados de xullo.
Segundo informou a Garda Civil este martes, os feitos producíronse entre xuño e xullo no hospital Álvaro Cunqueiro de Vigo, na base do 061 en Sabarís-Baiona e nunhas instalacións de ambulancias de Mos. A investigación iniciada entón concluíu coa identificación de dez persoas como presuntos responsables dos danos, que a Garda Civil vincula a traballadores de empresas concesionarias do servizo de transporte sanitario.
Os danos causados nos vehículos están valorados “en miles de euros” e consistiron, fundamentalmente, en picadas de rodas que provocaban que os vehículos quedasen inutilizados durante horas.
Os investigados teñen idades comprendidas entre os 39 e 62 anos e están acusados de delitos de danos agravados por afectar a bens de uso público e aos intereses xerais, co que se expoñen a penas de prisión dun a tres anos. As dilixencias instruídas foron remitidas ao Xulgado de Instrución número catro dos de Vigo.
