InicioSociedadeA Xunta insiste en que o PXOM de Vigo debe ser corrixido...

A Xunta insiste en que o PXOM de Vigo debe ser corrixido e que o actual documento pode ser tombado nos tribunais

A conselleira de Medio Ambiente, Territorio e Vivenda lembrou que a tramitación do Plan de Vigo se alonga desde hai case 10 anos.

PUBLICADO O

A Xunta de Galicia insistiu este venres en que o Concello debe “corrixir” o novo Plan Xeral de Ordenación Municipal (PXOM) para ter o visto e prace da administración autonómica, e advertiu de que, tal e como está agora o documento, pode ser tombado polos tribunais.

Así o trasladou, en declaracións aos medios durante unha visita á empresa Iberconsa en Vigo, a vicepresidenta segunda e conselleira de Medio Ambiente, Territorio e Vivenda, Ángeles Vázquez, que lembrou que a tramitación do Plan de Vigo se alonga desde hai case 10 anos.

Respecto diso, tras subliñar que se trata dun documento “moi pouco ambicioso”, aínda que recoñeceu que “se está mellor con Plan que sen Plan”. Tamén subliñou que a responsabilidade da Xunta é evitar que volva ocorrer o sucedido en 2015, cando o Tribunal Supremo anulou a PXOM aprobado en 2008.

Con todo, Ángeles Vázquez, puntualizou que os requirimentos que fai a Xunta non supoñen unha “paralización” do documento, como denuncia o goberno local encabezado por Abel Caballero. “Vai ser a paralización que queira o Concello, que é o que ten que corrixir, nun ámbito como o de patrimonio cultural”, engadiu, en alusión a algunhas áreas ás que “se quitou a preservación”, como o Parque de Castrelos ou a Fortaleza de O Castro.

Así mesmo, lembrou que o luns haberá unha reunión entre a concelleira de Urbanismo de Vigo, María José Caride, e a directora xeral de Urbanismo, Encarnación Rivas, para abordar as modificacións no PXOM. “Calquera persoa, organización, que presentase unha denuncia contra este plan, deste xeito, ao cabo dun mes Vigo volvería quedar sen Plan”, afirmou.

“Non sei por que nos empeñamos en non ter seguridade xurídica. Xa pasaron as eleccións, todo o mundo ten que estar moito máis relaxado e, a partir, de aí, traballemos polo ben dos vigueses, das empresas e a economía da cidade (…), non hai ningún interese máis que ter seguridade xurídica”, engadiu.

Finalmente, a conselleira lembrou o papel de María José Caride, actual concelleira de Urbanismo, no PXOM que foi anulado polos tribunais (e que aprobou unha Xunta na que Caride era conselleira), e trasladou o seu desexo de que “non pase á historia de novo” por un Plan que incumpra a legalidade. “Non sexamos os mesmos humanos os que volvamos tropezar coa mesma pedra”, sentenciou.

ÚLTIMAS

Vigo, epicentro da fabricación das narcolanchas

As Forzas e Corpos de Seguridade do Estado aumentaron nos últimos días a presión policial...

Estudantes de Vigo e Monforte álzanse con tres premios da competición educativa Young Business Talents

Dous equipos de alumnado do IES San Tomé de Freixeiro (Vigo) e un grupo...

A concelleira do PP de Vigo Irene Garrido presenta a súa renuncia para centrarse na súa actividade no Congreso

A concelleira do PP de Vigo Irene Garrido presentou este venres a súa renuncia...

O BNG promete ser “a primeira liña de defensa” de Vigo no Parlamento galego, fronte ao “abandono” da Xunta

O BNG trasladou este venres o seu compromiso de ser "a primeira liña de...