A portavoz nacional do BNG, Ana Pontón, esixiu este martes ao Partido Popular (PP) que “escoite a Vigo” e anunciou que a primeira medida que os nacionalistas solicitarán para atender as necesidades da cidade será reclamar que o 50% da vivenda proxectada no barrio de Navia sexa pública, para ofrecer en aluguer a prezo taxado. Así o sinalou a líder do Bloque nun acto de presentación do oito deputados que o partido obtivo na provincia de Pontevedra nas pasadas eleccións autonómicas do 18 de febreiro.

Na súa comparecencia ante os medios de comunicación, Pontón agradeceu o apoio “espectacular” que os vigueses deron ao BNG, que se situou como primeira forza política na cidade con preto do 37% dos votos, sendo así a “clara alternativa ao PP”. Isto, segundo dixo, “anticipa o futuro” e dálle ao Bloque “ilusión e esperanza” para seguir traballando e “construíndo en positivo” por Vigo e polo resto de Galicia.

“O PP debe de tomar nota do que pasou en Vigo, porque o Goberno da Xunta non escoite e non atende á cidade”, criticou Ana Pontón, pedindo ao Executivo galego que acabe cos “malos tratos e a discriminación” da urbe olívica e comece a escoitar “a todas as persoas que non pensan como o PP”.

Entre as súas peticións, a portavoz nacionalista referiuse á “misión imposible” que supón o acceso á vivenda en Vigo, polo que este problema centrará a primeira proposta que o Bloque levará ao Parlamento de Galicia na nova lexislatura. Así, solicitará que o 50% das vivendas proxectadas en Navia sexan públicas para aluguer social. “Estamos a falar dunhas 800 vivendas”, reivindicou, lembrando que ata 15 barrios de Vigo están “tensionados” por altos prezos no aluguer.

Ela destacou a importancia desta medida, referíndose a que o 40% das persoas inscritas como demandantes de vivenda protexida en toda Galicia é de Vigo. Pontón pechou a súa intervención pondo en valor esta “nova etapa” na que o Bloque “traballará con ilusión” e con “máis forza” por Vigo e por Galicia, porque os vigueses “merecen un trato distinto e á altura do apoio que lle deron ao BNG”.

O portavoz do BNG de Vigo, Xabier Pérez Iglesias, tamén puxo en valor os resultados electorais dos nacionalistas e agradeceu aos vigueses o apoio recibido.