A sede de Vigo da Deputación de Pontevedra acollerá desde este xoves unha dobre exposición dos artistas Rosendo Cid e David Fidalgo Omil, as cales estarán dispoñibles ata o 1 de marzo.

Segundo anunciou o ente provincial, ‘Máis alá De catro a catro’, é un proxecto de intervención sobre o poemario de Manuel Antonio ‘De catro a catro’ co que Cid tenta extraer “novos poemas”, nun sentido plástico.

“Faino desde un punto de vista vangardista, influído polo manifesto ‘Máis alá’, redactado polo poeta en 1932, e tratando de mostrar ao público non só a transcendencia da obra de Manuel Antonio, senón tamén un modo diferente de achegarse á súa escritura e á arte da literatura en xeral”, explicou a Deputación.

Pola súa banda, ‘Love’ é a exposición na que David Fidalgo establece unha reflexión sobre o cliché do amor verdadeiro na televisión.

“O artista leva anos producindo obras de animación sobre a sociedade que mostran a televisión e as redes, desde o punto de vista crítico e irónico, a través do concepto do meme e do absurdo”, engadiu a administración local.