Axentes da Policía Local de Vigo detiveron a un condutor, A.C., de 35 anos de idade e veciño de Alacante, como presunto autor dun delito de atentado e outro contra a seguridade viaria, por empuxar un policía, desobedecer as súas ordes e negarse a realizar unha proba de alcoholemia.

Os feitos ocorreron na madrugada deste mércores, cando unha dotación do 092 observou un turismo circulando de forma errática e en zigzag pola rúa Urzáiz. Os axentes observaron como o condutor facía un xiro prohibido e saltábase un semáforo en vermello, polo que procederon a darlle o alto.

Ao paralo, o condutor non se quixo identificar, alegando que non portaba ningunha documentación, e os axentes observaron que presentaba signos de atoparse baixo os efectos de bebidas alcohólicas.

Con todo, lonxe de colaborar, este home interrompeu varias veces a proba e, ao ser advertido polos axentes de que estaba a realizar mal o test, este reaccionou de forma violenta, cun empuxón a un dos funcionarios, ao que lle arrebatou da man o tiquet emitido polo alcoholímetro, e tentando abandonar o lugar.

Finalmente tivo que ser reducido e detido, porque non paraba de lanzar lapotes e puñadas cara aos policías e foi denunciado por un delito de desobediencia, resistencia e atentado á autoridade, así como por un delito contra a seguridade viaria