A concesionaria do bus urbano de Vigo, Vitrasa, denunciou este martes dous novos ataques contra vehículos, que se saldaron cun condutor ferido e danos materiais.
Nun comunicado, a empresa sinalou que na madrugada deste martes un bus da liña 17 recibiu un impacto no portelo dianteiro e que o condutor tivo que ser atendido en urxencias debido a “molestias nos seus ollos”.
O autocar estaba nese momento na cabeceira de liña, antes de arrincar o servizo, na rúa Pai Seixas, e non había pasaxeiros a bordo.
Por outra banda, outro bus, da liña 7, tamén sufriu o impacto de varios obxectos, o que causou a rotura dun portelo lateral e da porta dianteira. O ataque ocorreu ao seu paso pola Avenida de Clara Campoamor, cando se incorporaba ao servizo, e tampouco había pasaxeiros no interior.
Vitrasa comunicou que o custo dos danos causados por este tipo de ataques, que se repetiron desde principios de ano, ascende xa a case 31.000 euros. A dirección da empresa volveu a alertar contra estes ataques e a advertir de que os actos vandálicos pon en risco a integridade dos traballadores e dos usuarios.
Empresa e traballadores manteñen un conflito laboral desde hai máis de dous anos pola negociación dun novo convenio, con implicacións tamén cara ao Concello, xa que a concesionaria reclama o reequilibrio económico do servizo (compensación que a administración municipal está a calcular, segundo o goberno local). Desde o pasado 25 de novembro o persoal mantense en folga indefinida, e as concentracións e manifestacións sucédense ao longo de practicamente todos os días.
